陳家樂呻請月嫂人工揦脷

陳家樂與胡定欣等人，日前現身香港電影工作者總會晚宴。剛由日本返港的家樂曬到面紅紅，他指此行並非去旅遊，是去見醫生：“因為我媽咪身體有事，經人介紹透過視像睇緊一個日本醫生，但我覺得面對面會溝通得好啲，所以就同父母去日本，咁啱太太嘅工作臨時取消咗，可以一齊去。”他指媽咪身體還好，可能知道快將抱孫好開心，更說想湊孫。但他不想有婆媳糾紛，加上不想她辛苦，所以已請了陪月工人，不過媽咪都會幫手。”他呻陪月工人很貴：“唔係星級陪月，普通一個都要成七萬，而且好搶手，我一開始搵咗六七個都話冇期。”

胡定欣因有份演出電影《臨時劫案》，故獲邀出席春茗，很開心能跟電影人聚首一堂，想有更多機會在電影界發展。她說：“我對上一部電影已係《逆流大叔》，都想出席多啲電影活動，畀大家認識我。（會唔會主動出擊？）我都想，因為拍劇成日匿埋，唔係認得好多人，都要出席多啲活動，畀大家見到我真人，一齊溝通，而唔係透過電視劇識我。”身為視后可介意為電影試鏡？她說：“唔介意，試得鏡嘅角色應該好重要。無論係電視或電影，只要有工作都會接洽，當然我喺電視已累積咗好多，希望電影上多啲機會。”