開完演唱會瘦十磅

蔡卓妍：現在狀態最弗

昨日，韓國人氣男團SHINee成員珉豪(Minho)、泰國男星Dew Jirawat、蔡卓妍（阿Sa）出席法國珠寶品牌專門店開幕禮。不少粉絲一早到場守候，只為一睹偶像丰采。眾人十分識做，向在場粉絲大派心心。

阿Sa看來身形甚弗，她受訪時表示：“我最近都有得着，就係早前舉行完Twins演唱會之後，瘦咗十磅，我覺得呢段時間自己狀態好好，仲瘦過做女嗰陣時。雖然我平時唔鍾意做運動，但最近有咗改變，食完一餐唔郁，就會覺得會肥返，所以我現在迫自己一星期最少做兩次Gym，持之以恆，又覺得狀態好好噃。（開完演唱會之後，拍戲工作又如何？）原定今個月拍韋家輝執導的新片，但因為劇本改動，要延到五月先可以正式開拍。由於有空閒，我立刻留意半價機票優惠，想趁機去歐洲一趟，真係平好多，有時應使則使、應慳則慳，不過買了半價機票，要改就加要二千元，所以仲要考慮清楚，但夏天去歐洲真係好正！”

泰國男星Dew受訪時透露了近期的工作安排，他表示早前拍了泰國GMM電視台的節目巡禮part Ⅱ，另外要演出新劇《因為你是初戀》，“在新劇中我演一個孤單的人，展開一段男女之間的愛情故事。（會否想來港拍戲？）想呀，我都希望可以拍香港電影，但要先學好廣東話。（你們泰版F4的Win廣東話講得好好噃！）我都知道他講廣東話好好，我要急起直追，相信只要肯用心去學，應該不會太難的。”他之後即場用廣東話同大家打招呼：“大家好，我係Dew！”看來是有備而來。

Dew坦言自己從小就鍾意到香港旅行，“我希望不久將來可以再次來港，下次想帶埋家人一齊來。（早前你都來過香港啦！）係，上次我有去拜神，今次會逗留三日，第一日我已去了品嘗火煱，今晚收工都要去嘆美食。我最為食，但食極唔肥，哈哈！”