與黃智雯互摑戲真打

張曦雯首演反派過足戲癮

昨日，無線新劇《再見 · 枕邊人》到商場舉行宣傳活動，劇中演員馬德鐘、黃智雯、張曦雯、羅天宇、鄭俊弘等齊參與。他們向現場觀眾大派玫瑰花之外，又在台上玩遊戲，加上不少藝人的粉絲撐場，場面熱鬧。

張曦雯在《再見·枕邊人》中首次演反派角色，感覺好有新鮮感，笑言希望觀眾睇完後會憎她，這樣便可證明自己演出成功。她表示：“我喺戲中除咗演反派之外，仲要演媽咪角色，好有發揮，演起嚟過足戲癮。（你喺戲中演第三者？）其實我唔覺得自己係第三者，劇中Mandy（黃智雯）失蹤之後，我先同馬德鐘喺一齊，我更照顧佢生嘅仔。之後佢突然返來，計起嚟，佢先係第三者。我呢個角色，為咗個家可以乜都唔理。（你喺戲中同黃智雯為爭馬德鐘有互摑場面？）係，我從未試過打人，為咗出嚟效果好，我同Mandy為呢場戲事先排過好多次，我都有叫佢唔好留手，長痛不如短痛，好過拍唔好再NG。其實我嘅個性好平和，有唔開心事只會喊出嚟發泄。”

馬德鐘今次在《再見·枕邊人》中周旋於張曦雯與黃智雯之間，他讚張曦雯拍這部劇，演技有不少進步，將劇中人狂性的一面演得好出色，令人刮目相看。另外，他也讚黃智雯演出十分專業：“佢喺劇中有一場落水戲，當時天氣好凍，佢拍完仍留喺水中，話等拍埋下一場先上嚟，真係令我好佩服，我睇見佢都覺得好凍。”

身旁的黃智雯亦表示：“係呀，呢場落水戲拍嗰時氣溫只得十度，加上我唔識游水，又要浸個頭入水中，好彩得馬德鐘教路，將個頭慢慢浸落水，先可以順利完成拍攝。”談到她與張曦雯在劇中互摑的那場戲時，她表示：“我以前拍劇時多數係摑男人，摑女人都係第一次。（NG了多少次？）大約十次啦，好彩最後都順利完成，不過塊面就有少少腫，要搵冰敷。”

黃智雯早前到意大出席米蘭時裝周活動，她自爆在當地遇上扒手，偷了她放利市的袋仔，猶幸放證件的袋沒有被偷，完成工作後可以順利返港。