Twins台灣拍MV好興奮

Twins將於明年一月舉行的《TWINS SPIRIT演唱會》，由原來六場一加再加，兩次加場均極速售罄，最後加至十二場，打破自己出道以來的紀錄。廿二周年主題曲《雙喜樓》早前已推出，MV前晚正式上架。問到難忘及蝦碌事時，阿Sa謂這個MV拍了二十一小時，笑言：“拍到人都癲！”而阿嬌則被香檳噴中眼睛：“最尾開香檳時成支香檳噴落塊面度，我係完全睜開不到眼，可能大家留心點看就會見到我隻眼是開不到的，哈哈。” 這次快閃台灣，阿嬌坦言未出發先興奮：“好耐都冇去過台灣啦，所以有些興奮，因為好掛住台灣的小食，不過時間有點短，哈哈。”

阿Sa謂很久沒有拍自己歌的MV：“一聽這首歌個demo，已經覺得好正、好有演唱會那種氣氛，同埋係‘好Twins’。再夾埋這份詞更鍾意，因為聽填詞人先生講《雙喜樓》這個名，說在十幾年前已經好想寫給我們。《雙喜樓》顧名思義就當然講我們兩個啦，成雙成對，同埋我們廿二周年這個日子，Twins Spirit嘛，yeah！”阿嬌也說很久沒試過跳住舞拍MV：“今次特別請了之前為綜藝節目《乘風破浪的姐姐》的舞台總監為我們排舞，‘姐姐’的感覺即刻返晒嚟。”