在靚湯婚禮接到花球

高海寧認有人追仍觀察

昨日，高海寧（高Ling）與何廣沛、林正峰等《新聞女王》演員參與籃球比賽，為該劇催谷宣傳。高海寧日前在馬國明與湯洛雯的婚禮上接到花球，她表示多謝大家祝福，並自爆現在有追求者，會認真地選擇，若認為合適會發展。被問到可會像好友湯洛雯一樣選圈中人作對象？她笑言應該唔會。

馬國明與湯洛雯日前在泰國蘇梅島舉行婚禮，不少圈中好友應邀出席，十分熱鬧，為娛圈帶來喜氣。高Ling為閨蜜湯洛雯的婚禮做姊妹，接到新娘拋出花球，她之後接到不少好友及粉絲送上祝福，希望她好事近。

高Ling昨日出席《新聞女王》劇集的宣傳活動，當她接受傳媒訪問時，被追問接到花球之事。她笑言：“準確啲嚟講，其實我係畀花球掟中。第一次靚湯唔夠力冇人接到，跌喺我面前，到第二次就直接掟中我個頭，我有問佢係咪特登掟畀我，佢笑住話係有啲私心。無論如何，我都好多謝大家嘅祝福。”之後，高Ling笑言自己攞到花球後對感情事都有點期待：“岑杏賢同我講，佢都係喺朱千雪婚禮上畀花球掟中，結果好快識到現在嘅老公，我都好想睇睇係咪會咁神奇，哈哈。（喺馬明與靚湯的婚禮上有冇遇上‘筍盤’？）我私下問過馬明，但佢話認識嘅朋友中大都已婚。冇辦法啦，現時以工作為重。其實我依家都有人追，但我想再細心啲選擇，如果覺得對方合適，就會認真發展。（會否好似靚湯咁選擇圈中人？）應該唔會。”

談到《新聞女王》在無線台慶頒獎禮上有廿多個提名，高Ling亦獲提名最佳女配角獎，她表示：“係呀，但競爭都好激烈，我反而希望《新聞女王》贏得最佳劇集獎。（可知有傳《新聞女王》已籌備拍續集？）係咪呀，我當然好想拍啦，聽聞阿佘都開到聲想再返嚟拍續集。”

另外，《新聞女王》監製鍾澍佳對該劇有廿多個提名感到好開心，又大讚劇中演員都演得好好。他笑言：“希望《新聞女王》續集可以快啲推出啦。”