才子歌仔可避孕

“兩個就够晒數，兩個就够晒數。生女也好，生仔也好，兩個已經够晒數。無謂追，無謂追，追得到也未必好；追唔到呢生壞肚。兩個就够晒數，兩個已經够晒數！”豬仔一竇公婆倆，海中孤舟搖搖曳，雞手鴨腳，倒瀉籮蟹。叔父諗起好笑，直言此廣告救了不少香港人。

社會艱難，生活困頓，其時冇乜娛樂，收工返屋企，越窮越多仔，唔少家庭斷擔挑。家計會“乞燒”避孕冇效果，唱支歌仔教化你。

曲詞淺白，入心上腦。俗語有云：過癮幾分鐘，辛苦幾十年。由是港人開始覺醒，一個起，兩個止。誰人如此絕核抵死，靈過避孕葯？此，不文霑，黃霑也。

霑女問老竇：愛情係乜？老霑直言：愛情來時，兩個嘴就會黐埋。霑女將之作文，老師批曰：上樑不正下樑歪。老霑聞言嬲爆，於報上專欄媽足一禮拜。

老霑大情大性，才情横溢，無所顧忌，終其一生，卻頗得眾緣。十九年前今日，霑公歸道山，齡六十三。

西門公子