東映鐵漢中國緣

小田剛一，絕對冇人識；高倉健，聞名也矣！上世紀六、七十年代日本銀壇鐵漢，其酷其帥，一度成內地萬千女粉夢中情人，男粉則以仿其型為時髦。《追捕》一片瘋魔內地，奶油小生唐國強失寵，高倉健當頭起，乃拜文革長期封閉後國門開放之賜。

高公原學商，惜戰後蕭條，難以營生，無奈入東映。卻疴尿撞棍，演了部動作片，反成東映俠義片台柱，由此闖盪影壇。因為人正派，行事謹慎，故甚有粉絲緣。

高公對中國有情結。乃父係礦山技工，曾服務日治時期中國東北。高公《追捕》一片，乃內地文革後首部引進之外國片，影迷餓戲久矣，一時狂熱追捧。高公T恤企領之形，即成當時潮着。

其時尚係花靚仔之大導張藝謀亦有樣學樣，並視高為偶像。因有此緣，亦促成高、張二人日後合作張導、高演之《千里走單騎》。此亦係高公唯一中國電影。

九年前今日，高公歸道山，齡八十三。

西門公子