雲浩影拍MV撻生魚

Cloud（雲浩影）初嘗作曲人滋味，與前輩們一起創作新歌《放下放不下》。她特別在MV中穿梭多個場景，透過漫遊夢境表達出要調節好心態面對“放不下”的人和事，接納這些都是成長的美好回憶。當中有一場要飛撲到床上，Cloud來回飛撲了十幾次，導演才收貨。她剖白歌曲構思：“歌詞係講，有啲人陪我哋走過青春，久唔久會諗起佢，想知佢過得好唔好，啲人成日都話要放低，但我覺得放唔低都唔緊要，所以就有呢首歌《放下放不下》。”

談到MV拍攝，她說：“真係撻咗好多次！因為要夾埋工作人員嘅動作，而我想畫面唯美啲，保持個樣靚，希望跌落床一刻感覺溫柔啲。但其實係撻落去！而MV故事是講述我夢回過去，有一個男生陪我走過青春，縱容和容忍我嘅任性、教識我成長、學習去愛人；可惜長大後，我愛嘅人唔再係佢，因此有一幕醫院場境，寓意我係一個愛情病人，對愛情好執着，但其實選擇只有‘一係就由得佢，一係就完全放下’。我自己某程度就覺得由佢放唔低，唔使執着一定要放下，因為都係美好回憶，陪伴大家走過青春。”