紅軍兩蛋贈拖肥

【本報消息】英超周六早場默西塞郡打吡，紅軍食“糖”重返勝軌。沙拿攻入英超第二百球，梅開二度助紅軍兩球淨勝十人應戰的愛華頓。

今季首場利市打吡，晏菲路主場的利物浦，由沙拿領軍L迪亞斯、祖達進攻，中場麥亞里士打、蘇保斯拉爾聯乘加雲貝治，森美卡斯頂替肩傷須長唞的羅拔臣出任左閘。愛華頓由麥尼爾、利雲、杜哥利等主力領軍。

主場的紅軍開賽後隨即搶得主動，沙拿早段錯失機會，碧福特隨後又救出麥亞里士打攻門。戰至卅七分鐘，艾殊利揚格侵犯L迪亞斯，兩黃一紅被逐，愛華頓未夠半場踢少個，幸保不失。

踢多個的紅軍下半場優勢更明顯，但面對愛華頓死守，大部分時間得勢不得分。沙拿射門被對方守衛擋出，紐尼斯射門亦被碧福特救出。七十四分鐘，M堅尼禁區手球輸極刑，沙拿操刀射入英超第二百球，助紅軍打破僵局領先。紅軍尾段有艾利洛、蘇保斯拉爾、祖達射門失機，但補時階段靠反擊，紐尼斯助攻沙拿單刀鎖定勝局。利物浦主場二比○擊敗愛華頓。

紅軍終止兩戰不勝，九戰得二十分，暫踢多一場，以較佳得失球上榜首。愛華頓七分排十六。