宋才潘面菜籃兒

吳國良，冇人識；尊龍，嘩！響垛矣。《末代皇帝》由孤寡高傲到耷頭落難，直是溥儀翻生；《龍年》個江湖大佬，霸氣迫人，滿口鬼文，偶爾爆兩句廣州話粗口，醒神到痹。僅此兩片，已名震全球。

生於香港，卻無父母，乃菜籃棄嬰，由善心殘障滬婦收養。十歲學京戲，成年赴美。為籌學費，曾務百業，洗碗、送貨乜都做。因天資聰穎，考得全美僅兩額之一，入選劇團。

雖優位厚酬不要，謝絕合同，寧再勤工儉學，更上層樓。終考入美國戲劇藝術學院，成就演藝之路。自此遊走影壇，出人頭地。

尊龍靚仔有型，係亞洲首席美男，花旗國雜誌更評為全球五十美男之一。不獨粉黛垂涎，麻甩佬亦覺佢靚仔。大記者當年曾在維港天星小輪同佢偶遇，近在咫尺，果名不虛傳。然佢冇靠靚仔搵食，演技實打實鑿，故獲獎無數。今日係佢七十二齡牛一。

西門公子