黑妹酒廊歌手發家

活躍娛圈半世紀、既唱又演的六十三歲“黑妹”李麗霞，自認既魚又臭——“二十歲就吸煙，曾經和尹光拍電視劇，被嫌棄隻手煙味臭到想嘔……二〇一九年終於戒煙，主要係孫仔，我一抽，他就大叫婆婆好臭。既然有病就索性戒煙，都唔想畀人話我好臭。現在，香晒！打麻醉藥多，記性不好，唔打麻將，早瞓；冇拖拍，戒色、戒賭、戒煙，乜都戒晒。不過，現在才活得精彩……”

星際義工團！黑妹創辦人之一，宣佈：十月三十日，假香港文化中心主辦《星濟 · 好聲音慈善晩會》，不扣除開支，全部收益捐助兒童癌症基金，癌症病患者黑妹的意願。

她透露，音樂會入紙原以個人演唱會申請，但身體又出現問題，獨力難支；肥媽提議，黑妹、彭家麗、韋綺珊一起搞，都為慈善。“所以，叫身邊朋友每人捐一萬贊助舞台，肥媽第一個支持，好多朋友都支持，十分感動。”

女兒蔡穎秋參賽《中年好聲音》，“我一直禁止女兒當歌手，”黑妹坦言，“從不教女，認為女兒是朋友，對方有甚麼都對我講。拒絕女兒入行，因為冇天份……”前輩歌星黑妹慨嘆——“這一行眞的好辛苦，亦好講運氣。運氣不好，會更加吃力。唱歌，當興趣就得。”

黑妹音樂會上，曾與女兒、細孫仔同台。細孫仔唱《We Are The World》，大為感動，“細孫仔有天份，繼承了婆婆本事。女兒就唔得，講眞，自己女兒都係咁啋。”儘管細孫仔有天份，黑妹直言，不想細孫仔靠唱歌搵食。

人生的不幸亦大幸，黑妹十三歲自動輟學當歌手，荔園、酒樓、夜總會、酒廊，再唱到內地歌舞廳……一九八三年返回香港發展，參加第二屆新秀歌唱比賽，“冇人記得我啦，只記得冠軍呂方。”黑妹直言，“我根本不想入圍，當時大住個肚。只因有個女性朋友幫我報名，那時我在酒廊唱到嘭嘭聲。但比賽就是比賽，歌賽時揸住支咪好驚，加上我的運氣總是平平，要搵錢養女，我不能坐着等運到……”

回想當年，一日唱七場餐廳酒廊，搵好多錢。“參加新秀，又令我加了人工，入了十五強。到舞台總決賽後，無論賽果如何，能在電視亮相，歌酬又高了。電視影響力眞係好大……”黑妹意難平是：此生贏了名利，卻輸了健康……

（黑妹臭史 · 二之一）

高 梁