觀衆方是功夫王

羅拔明可夫，有冇人識？好似冇。迪士尼卡通片《獅子王》識冇？識者多矣！話你知，明可夫就係《獅子王》導演。所導卡通片，全球大殺三方。年前拍魔幻片《功夫之王》殺入大陸，收個盆滿缽滿。

美國人，卻甚有中國情。出生於舊金山，挨近唐人街。自細迷戀功夫片，崇拜胡金銓、李小龍，喜看《黃飛鴻》、《龍爭虎鬥》與《醉拳》。因畫功了得，大學未畢業，已入迪士尼。後拍《獅子王》，一片成名。

不獨如此，連老婆亦係華裔。孔令華，孔子七十六代孫。當年朋友生日會，明可夫被邀鋼琴伴唱，孔大小姐紅花配綠葉，一曲而後拉埋天窗。婚禮亦中西兩不誤，順晒哥情，不失嫂意。

出於中國情結，佢天馬行空，要紅毛小子去救孫大聖，拉成龍、李連杰拍《功夫之王》。兩大高手過招，記者問，成龍對打李連杰，邊個贏？明可夫奸笑曰：觀眾！

今日乃明可夫六十一齡壽辰。

西門公子