澳球壇煞科睇好波

本地甲組足球聯賽及足總盃步入尾聲，澳科鄒北記完成在聯賽提前封王。不過足總盃以至聯賽護級戰，出現近年難得的競爭場面，臨近煞科球迷仍有好波睇。

近季在本地十一人賽事幾乎無敵的澳科，今屆迎來各種挑戰，近月出戰中冠聯賽要分心，為球隊兵源及狀態帶來重大考驗。雖然成功保住聯賽冠軍，不過月初聯賽被青鋒逼和，再在足總盃輸給賓菲加出局，疲兵之下令澳科出現近季罕見的低潮，間接令足總盃出現蒙地卡羅、賓菲加爭冠的戲碼。

蒙卡、賓菲加兩軍今季幾次對碰，反映實力在伯仲之間，兩軍現時仍為聯賽次席鬥到最後一輪分勝負。足總盃決賽互撼，為爭取重奪錦標同樣戰意甚強，或能為球迷送上精彩的決賽，令人期待。

聯賽、足總盃屬“Big4”囊中物，聯賽最後哪一隊有得留低的護級戰，今季亦鬥得激烈。實力中堅分子聯樂，聯同去季乙組冠軍恆勢，雖然整體表現未算出彩，但有分落袋最重要，成功提前上岸。榜尾兩支球隊，士砵亭、台星將在本周六倒數第二輪直接互撼，兩軍在煞科戰則要分別鬥蒙卡及賓菲加，決出護級席位，亦為次席之爭添亂，話題性十足，同樣值得球迷留意。

賈大廚