昨晚賽事總投注二百四十四萬

譚文就高君濤起孖

昨晚沙草混戰完成。是仗出馬稍增，五場投注額共收二百四十四萬元。

頭場五六班混戰跑出熱頭大冷腳。譚廄“大玩意”由牌仔劉傲主轡，埋門險勝在澳多仗輸至無影的大冷馬“俊楠”，替馬匹勝回一仗。“大玩意”沙地好手季內連場減分無建樹，上次用中野省吾搏殺只跑梗頸。拼後小休增程再戰，今次落班用牌仔減磅出擊，劉傲操刀埋門險勝，三倍熱W贏來“魚生粥，僅僅熟”。譚文就季內沙戰例有馬贏，尤與劉傲合作愉快。練、騎屢有戰功，堪稱好拍檔。

第二場張志立騎基廄新馬“兄弟班”，以快放本錢取勝。此駒在澳首次上陣，臨場受人追捧成次熱門，獨贏只得三倍。騎者出閘快步搶先，三扒兩撥由中路透出，沿途帶頭領放，一口氣直領到底。“兄弟班”早熟分子一出即勝，贏來輕鬆自如，反映馬有潛力，全熟後料有一番功業。張志立、林宏基攜手添頭馬。

第三場輪到高君濤贏馬。此子第二場策“步快如飛”飲恨第二，是場騎馮廄“夠響至上”以強勁衝刺，挫敗大熱門“飛賣品”替馬房建功。“夠響至上”上次由約尼斯跑短途拼得第二。今次走馬換將用高君濤主轡發揮又不同，騎者出閘跟住第四位，入直路發力衝刺，埋門超越對手悉先衝線，跑完獨贏有七倍分頭不俗，馮耀正廄添一W，騎者居功不少。

第四場譚文就搏殺起孖。旗下“玫瑰勇士”由巴西邵艾樂主轡，以快放姿態爆出十三倍冷W。此駒跑沙地為最佳出路，上次同程由余健雄執鞭跑第六，今仗換邵艾樂再拼。騎者出閘快步跟出第二位，沿途拍實前領馬“西花園”而走，入直路發力甩開對手，走至埋門要同後上馬“頂峰傳奇”影相，結果以馬鼻位險勝對手替馬房建功。邵艾樂增添在澳第三W，譚文就喜中兩元。

尾場高君濤贏蔡廄“白龍駒”起孖食尾餬。此駒季內屢拼未能出頭，跑極最叻得第二。今次用到冠軍騎師高君濤執鞭，騎者出閘搶放，一氣呵成直帶到尾，替馬匹打破屢戰不勝悶局。蔡鎮威廄贏馬交代，騎者孖寶進帳。