昨晚賽事總投注二百三十餘萬

兩騎一練搏殺起孖

昨晚沙地賽完結。是仗出馬少且淨跑五場，總投注額共二百三十二萬三千元。

頭場五班混戰爆出半冷。高君濤騎陳俊輝廄“年年冠”，以較佳留放後上挫敵。此駒季內跑沙地已取兩勝兩位，近幾仗減分性質無功而回。上次草戰用高君濤主轡，敗後易地再來，今番復跑拿手途程即起筷，騎者交出水準替馬房建功。“年年冠”獨贏逾四倍算不俗，連贏搭“肯定贏”派逾三百買中者好分。陳俊輝贏得久違的頭馬，高君濤功不可沒。

第二場普健士騎麟廄“飛賣品”，以兵不血刃姿態取勝。此駒上次中野省吾跑千五米得第二未竟全功，拼後縮程再戰。改配普健士執鞭出閘搶放，一口氣直帶到尾，大勝對手七個半馬位，替馬匹平反敗局。跑完獨贏只得十三文，幕後人食雞餬補中。麟廄喜添一W，普健士亦居功。

第三場普健士搏殺起孖。此子贏完“飛賣品”乘勝追擊，是場騎兆廄“盛通精神”埋門險勝高君濤“馬主聯盟”，爆十六倍冷W。此駒季內在兆廄手上未出頭，最叻跑過兩次亞軍。近期連敗三場減分再來，今次用普健士執鞭發揮上佳水準，挫敗對手替馬房建功。張兆煊廄贏馬交代，騎者一口孖寶收穫不俗。

第四場輪到高君濤起孖。此子騎馮耀正廄“夠響至上”以快放姿態走返。此雙人馬上次短途力拼得第三未能贏馬，今次原配增程再來，遇上馬少場合快馬不多。騎者出閘快步跟前，沿途節節推進，入直路發力衝刺悉先過終點，贏來猶有未盡，替馬匹取得季內第二W。馮廄添頭馬，高君濤起孖。

尾場何華麟廄起孖。旗下“逍遙尖子”由黃世浩主轡，以快放本錢挫敗大熱門“浩勝盈寶”。此駒季內多仗不勝有位，演出水準穩定。上次力拼屈居第二，今次原裝人馬捲土重來。騎者出閘快步守住第二位，入直路發力衝刺甩開對手率先衝線，替馬匹勝回一仗。黃世浩喜添頭馬，何華麟起孖食尾餬。