蕭正楠爆黃翠如扯鼻鼾
第三季《思家大戰》本周日將播出新的一集，在問答環節“花生”指數爆燈。身為人夫的蕭正楠答問題時，除了暗指太太黃翠如瞓覺扯鼻鼾，更口快快暗爆翠如唔幫手執屋，他說：“佢負責睇住我執。”自知一時多口的他之後急忙補飛：“但我都開心㗎！”花式曬恩愛，閃盲全場！伍仲衡連番爆Seed，其中一條的問題“講一對TVB最恩愛嘅夫妻或情侶”時，他的答案竟然可以令全場掌聲雷動，就連見慣大場面的思捷亦佩服得當場O嘴，久久未能說話，更即場以跪拜來表達當刻心情，老友區永權之後不禁笑伍仲衡“亂講嘢”。
蕭正楠率領的“HEART”隊，成員包括伍仲衡、區永權、劉威煌及張翼東，對戰由家庭觀眾“靚聲王”陳銳強率領的“KOL夢之隊”。一開始，蕭正楠、伍仲衡和區永權即場獻唱三人的限定男團“HEA”主題曲《HEA到爆》，炒熱全場氣氛。曾於上季模仿李思捷扮劉德華的“扮嘢能手”張翼東，當時因思捷居家辦公未能現場欣賞，今集終能於本尊面前炫耀，思捷看後大讚“Nice”。
