寶湖之友

鬥心旺盛

今晚四草一沙混合賽，各場形勢依然緊湊，馬少場合暗湧甚大，賽果熱倒冷爆唔奇。日將中野省吾上仗違例被停賽十日，現正上訴無緣上陣。前領高君濤少個對手成一人獨大，今仗五駒出戰，必趁勢發圍。

高君濤今季已取三十八W，頭馬數字甩開對手，奪取本屆冠軍機會濃厚。此子偶爾“發馬瘟”，令捧場客損手。近期不少騎者喜打時價波，陣上表現“一啖沙糖一啖屎”。高君濤騎功壓一，下風馬跑高半班成捧場重心，今晚精品在手，臨場吼緊。

第一場：四五班一五一○米。“浩勝駿綵”上仗同程後追第五，直路走勢頗強勁，雖未能闖入三甲，但表現有回勇跡象。此駒拼後再磨，強配高君濤擺明搏殺。馬匹沉後回起，計馬現時居班有利，憑人強馬壯，可一網打盡。

第二場：四班一○五○米。“奧新旋風”上季同程開齋，之後連場敗北馬主要轉倉。此駒轉投馮廄重新操養，上仗出擊捧成熱門，人馬已經試準。“奧新旋風”沙地短途唯一出路，同高君濤夠夾檔，今次續爭贏馬路程，騎者駕輕就熟可推翻一切。

第四場：三四班一三五○米。“寶湖之友”沙地戰績不俗，演出水準穩定。上仗落重飛搏殺只跑入連贏位，馬匹走勢已回起。此駒能放可追，鬥心旺盛。拼後小休重來，今次原程續戰，高君濤主轡人馬合拍，憑路合班宜，可視作馬膽看待。