昨賽事總投注二百三十餘萬

兩練一騎搏殺起孖

昨天沙地賽事完結。是仗戲碼平淡，五場總投注額共二百三十三萬二千元。

頭場六班混戰，譚廄三駒列陣施馬海戰術，“醒目仔”交由牌仔梁曉傳執韁，出閘以快放姿態走返。此駒上次草地千二米落敗而回，拼後小休轉戰沙地，原裝人馬再搏。梁曉傳今次起步即放，沿途領先一口氣直帶到尾，贏至對手離行離列，替馬匹取得沙地首捷。“醒目仔”服役後未贏過頭馬，最叻跑入位置。今次贏來如有神助，質新分子開竅後仍有進步，下次再來未可輕視。梁曉傳、譚文就先拔頭籌。

第二場何華麟贏馬，旗下“逍遙尖子”由黃世浩主轡，以快放本錢取勝。此雙人馬近期屢拼不出頭，最叻跑入位，上次同程得第三未竟全功。今次小休儲火再來，騎者出閘快步搶放沿途領先，入直路發力衝刺，甩開對手率先過終點，跑完獨贏有十一倍，分頭不俗。“逍遙尖子”一向難贏，今次贏馬開齋，黃世浩、何華麟齊居功。

第三場譚廄搏殺起孖，旗下“誰愛合金”由中野省吾主轡，出閘快放由頭直帶到尾，大勝對手多個身位。此駒已久未贏馬，沉寂一輪表現復甦，上次由牌仔出擊未竟全功。今次用中野操刀發揮水準又不同，出閘應聲彈出，全程領放一氣呵成走返。“誰愛合金”勝出頭馬，譚文就起孖。

第四場劉傲贏梁國浩廄“珍珠大哥”。此雙人馬上次跑同程得第三未能贏馬，拼後小休捲土重來。今次起步快放搶先，沿途且放且走，入直路彈甩對手直奔終點，贏來兵不血刃。“珍珠大哥”喜再獲沙地頭馬，騎、練齊齊居功。

尾場梁曉傳、何華麟齊起孖。騎者替麟廄“自在逍遙”押陣，以強橫後勁退敵。此駒上次草地千八米跑第二，拼後易地再來，今次原配負重磅跑一三五○米，騎者以較佳留放，後上挫敵替馬房完成孖寶任務。梁曉傳是日亦梅開二度收穫豐富。