林明禎坐玻璃纜車冇畏高

林明禎日前帶媽媽一齊為昂坪360拍攝廣告，寓工作於娛樂，心情大好，不時擺Pose自拍。她自爆係纜車迷：“今次係我第一次坐昂坪360纜車。不過如果去海外旅行，坐纜車係指定動作。所以一聽到話為呢度拍攝宣傳片，可以率先搭幾乎係全透明嘅車廂時覺得好特別，點都要接呢個Job。呢日同媽咪一齊嚟開工，佢都玩得好開心。我見媽媽都影咗好多相，所以計劃遲啲帶埋家姐同細佬再嚟多次，當作係家庭旅行。”

纜車四邊同底部由全透明強化玻璃製造，明禎以為自己會畏高，點知掛住睇風景唔記得咗驚：“搭纜車沿途有山有水，所以掛住睇風景唔記得驚，仲同媽咪喺車廂內周圍自拍！其實我自拍都有啲秘技嘅，就係影好多張相，影到自己滿意為止，再慢慢刪去唔好睇嘅照片。不過有人幫我影就更好！所以如果男仔識幫女仔影相，係會加好多分。大家記得追女仔前要先增進攝影技巧。”聖誕在即，明禎最想放假與家人共度：“今年聖誕要留港工作，所以好懷念入行之前跟家人開Party、看燈飾的時候！我已經準備好禮物送給他們，工作忙，平常少時間陪媽咪，要好好報答她。”