M嬸眼神懾觀衆

M，並非粗口，係電影角色。007鐵金剛迷一睇就明，此乃占士邦老頂。英人習慣事頭婆話事，國家如是，諜報部門亦當循此例。鐵金剛系列片自《金眼睛》始，由男事頭變為女事頭，M嬸應運而生。

占士邦智勇雙全，M愛恨參半。邦叔行事，死到臨頭方會鹹魚翻生，至令M飽食驚風散；更不時獨闖私邸，駭其電腦，搜其密件，M則嬲爆。雖曾幾度欲忍痛斷臂，終歸不捨，M與007難捨難離。

愛恨交集，卻惜才如命，茱迪丹芝演來不慍不火，一個眼神，已知007疴屎疴尿，M一角非佢莫屬。戲份唔多，卻擔起成部戲，鐵金剛片算佢最夠斤両，難怪從影六十餘載獲獎無數。

茱嬸四歲首次隨父母睇表演，即戲魔上身，終身為戲奔忙，演M角濕濕碎耳。有評曰，佢“以傳神的目光和尊貴的氣質征服觀衆，而不僅靠服裝對白。”睇過佢戲者，當有同感。今日乃茱嬸八十八齡壽辰。

西門公子