昨日賽事總投注二百二十餘萬

高君濤張志立起孖

昨天草地賽完結。是仗出馬踴躍戲碼不弱，五場賽事總投注收二百二十一萬七千元。

頭場五六班混戰，劉志森廄贏馬開餬。旗下“海洋之星”由高君濤主轡，以較佳留放後上挫敵。此駒上次新季首戰無功而回，馬匹經熱身後再來，今次出爭長途千八米用老搭檔高君濤搏殺。騎者出閘守住內欄好位，沿途亦步亦趨，入直路發力一攻而破，替馬匹開齋，跑完獨贏六倍分頭不俗。劉志森新季開勝門，高君濤先拔頭籌。

第二場林宏基廄贏馬，旗下“勝利寶”由張志立操刀後上掄元。此匹新馬在澳首次出賽，臨埸賠率半冷有五倍。騎者出閘稍慢跟在尾二，沿途貼欄節節推進，入直路展強勁衝刺，埋門將對手一網打盡。“勝利寶”初出即勝，反映早熟且具潛力，料開竅後頭馬陸續有來，下次再出仍可吼。林宏基、張志立齊添頭馬。

第三場張志立搏殺起孖。此子贏完“勝利寶”後乘勝追擊，是場騎錢健明廄“陶醉”，以強勁衝刺後上取勝。此駒上次高君濤跑第二未竟全功，今次改配張志立操刀再戰。馬匹負重磅未受影響，直路發力贏來游刃有餘。此駒跑千五米上名率高，贏後加分再來仍堪重視，錢廄贏馬，張志立是日起孖收穫豐。

第四場何華麟贏馬。旗下“安達獵隊”由中野省吾執韁，出閘以快打慢，全程搶先貼欄領放，一口氣放返大勝對手多個身位。此雙人馬上次沙地贏完再來，今仗跑草地一樣掂，表現無懈可擊。麟廄喜添進帳，中野省吾應記一功。

第五場高君濤起孖食尾餬，此子騎賀蘭杜夫廄“美麗人生”後上退敵。此駒久無頭馬見面，連敗減分后今次增程再戰。騎者留放有度，埋門一攻而破，替馬匹取得今季首W。賀廄開齋，高君濤起孖。