鄧兆尊真係隨口噏？

“我老竇鄧永祥，即係新馬師曾，他在家中靜靜教我……。”鄧兆尊任網台當嘉賓，先聲奪人。伶王當然傳授秘笈，不是粵曲唱工；而是，如想男性雄風厲害，就用筷子敲打下體……。懷疑伶王生了個儍仔——

“居然有個儍仔眞係跟着去做……。”鄧兆尊直認，“當時十二、十三歲。我老竇眞係一個好演員，講來眞嘅一樣，害得我吖……。”如今，鄧兆尊是個“好演員”了，曾志偉信——據講，幾次邀請兆尊入無線，在內地做聯絡人。不過，鄧兆尊自認普通話不靈光，不希望影響總經理的聲譽，推卻了。但，鄧兆尊性格易結女人緣。自言內地抖音不少粉絲主動報名做女朋友，全遭“拒人千里”，三個字：未通關。

有條件走紅的藝人，為何總是不紅。冇厘正經的鄧兆尊，有時好正經——我見過一個都算幾紅嘅歌星，出過兩、三隻唱片。大家明明好Friend。有次，在TVB遇到佢，擦身而過，佢睇我唔到，（佢對眼生高咗？）可能佢條頸扭親，岳高個頭行。當時，有個梳化服同事跟我講，哼，呢種人好快打柴喇……。不出半年，條友跌晒落來，佢本身級數好高，只係比四大天王低啲啲，他新秀出道，同我差唔多年齡。呂方、張衛健、李克勤……？以存忠厚，鄧兆尊沒有開名。

藝人衰起上來，舉手投足，眉稍眼角足以致命。慣看藝圈上層下層生態的鄧兆尊隨口噏，女藝人走紅，也有走捷徑的——

有位好聲音入圍人物，皆稱好潛質，屢次未派錄音做節目，找高層查詢……。“哎，搵高層，佢識路呀，不過……。”鄧兆尊扮老行尊，“佢做漏一樣嘢，要搵高層培訓。”係講Training嗰種培訓嗎？“梗係啦，唔係你以為甚麼培訓呀。”鄧兆尊陰陰笑，話中有骨，“畀條捷徑大家，紅磡呀，有間大酒店……。”啋聲四起，這裡是殯儀館集中地，俗稱“大酒店”。萬國？世界？“仲有，死人唔去生人去嘅酒店，隔冇幾遠之嘛，好多高層出入。唔好問點解，唔好問Training，你去嗰度就OK”。卻原來，酒店有兩種，生人與死人。還有Training有兩種意思。唔明，你太清純！恭喜。

高 梁