昨日賽事總投注二百餘萬

高君濤三元進帳

昨天草地賽順利完結，是仗跑五場投注額共收二百○六萬三千元。

頭場三、四歲馬跑千二米，高君濤騎基廄“一代天驕”大熱掄元。此雙人馬上次同程贏馬，拼後小休再來，今次原配爭原程仍受人追捧，獨贏熱至得十三元。騎者出閘順利跟貼對手，沿途亦步亦趨，入直路發力衝刺，埋門突圍而出率先衝線，贏來全無壓力。“一代天驕”質新馬開竅後打疊贏，料今季持續進步還有頭馬見面，成馬房取分棋子。高君濤、林宏基攜手先拔頭籌。

第二場高君濤起孖。此子贏完頭場乘勝追擊，騎適廄“快遞奇兵”以較佳留放後上挫敵。此駒一向同騎者夾檔，自上季贏完已久無頭馬見面。今次回配老搭檔高君濤主轡，發揮又不同凡響，出閘貼住內欄守好位，沿途不慌不忙，入直路展開強勁衝刺，將對手一網打盡，替馬匹重開勝利門。王君適廄喜獲新季頭馬，高君濤梅開二度。

第三場余健雄贏馮廄“天騏貓”。此雙人馬上季取兩W，唞暑後今季首度出戰。騎者人馬重逢駕輕就熟，出閘跟順且戰且走，入直路一攻而破，替馬匹取得新季首W。余健雄、馮耀正齊添進帳。

第四場梁曉傳贏馬。此子騎蔡廄“如意娉婷”，以強橫後勁挫敵。此駒上次跑短途得梗頸四，拼後增程再戰，今次易配梁曉傳跑千八米，騎者發揮上佳水準替馬房建功。蔡鎮威添頭馬，梁曉傳居功。

尾場高君濤中三元食尾餬。此子騎林宏基廄“盛通寶寶”，以輕鬆姿態挫敵。此駒初次上陣，出閘快步跟住第四位，直路發力彈甩對手，跑來有前有後，替馬匹取得來澳首W。基廄是日起孖，高君濤三元進帳，成績一枝獨秀。