勇強旋風可響勝鼓

上仗新季開鑼，錢健明廄即搶攻，喜獲兩元進帳，迅速登上榜首地位。今日沙戰續有精品列陣，馬房旺開就旺，值得吼緊。

另路人馬張兆煊廄開鑼賽交白卷。馬房要睇定至郁手，今仗七駒應戰強陣出擊。張兆煊一向不打無把握仗，馬房吼準時機便出擊。上仗開鑼賽多駒敗走後再來，馬匹經熱身料有不同表現，今仗兵分多路搏殺，睇環境有馬贏，愛將張志立及田中正一齊接“柯打”去馬，臨場可留意。

第三場：一二班一三○五米。“勇強旋風”上仗負重磅出閘甩拖，張志立跑來進退失據，馬匹敗得含糊。拼後匆匆而來，走馬換將用田中正一主轡，今次又不同估計。此駒沙地特佳，同程更屬拿手好戲，熱身後加強配搭擺明車馬要搏殺。今仗磅位減壓，欣逢路合，可敲響勝鼓。

第五場：六班一○五○米。“大勢已來”上仗千二米埋門力弱只得第五，但馬匹前中段走勢不差。此質新馬實力未見底，季內料有進步空間，今次轉戰沙地形勢逆轉。此駒饒有速度，跑同程力足應付。復配張志立人馬合拍可爭功。

第六場：四五班一五一○米。“頂峰神驅”上季尾余健雄跑千五後上第三，此役對手強盛亦有好走勢，馬匹表現勇進。此駒沙地贏過，路程無問題。今仗唞夠出擊，回配老搭檔張志立正如魚得水，憑人馬夾檔，可打開新季勝門。