開騷唱別人的歌

陳柏宇王嘉儀亦師亦友

前晚，陳柏宇(Jason)與王嘉儀(Sophy)在九龍灣國際展貿中心Star Hall首度合作舉行香港本地音樂會系列《我是現場》音樂會，擦出教人意想不到的音樂火花，為樂迷帶來驚喜。二人經過這次合作，變得亦師亦友，完騷仍雞啄唔斷大談音樂經。

有別於過去的《我是現場》音樂會，Jason與Sophy今次除了獻唱新歌《命盡頭》、《自然變態》等自己的作品外，他們用上超過一半的時間大唱別人的歌，如馮允謙的《思念即地獄》、柳應廷的《人類群星閃耀時》、鄭欣宜《先哭為敬》、Serrini《Let Us Go Then You And I》等，當中很多歌曲更是重新編曲，給人耳目一新的感覺。原來二人只用了個多星期學唱這些歌，籌備過程極短，但Jason十分享受這次演出。

經過今次的合作，Sophy感受到Jason唱功深厚，很想跟他的歌唱老師拜師學藝，怎料卻擺出大烏龍，她在台上自爆：“我問Jason跟邊個學唱歌，佢話係側田，我聽到未覺異樣，同Jason講我都想跟側田學唱歌，點知原來佢係話吉田！”惹來全場爆笑。

音樂會結束後，Jason與Sophy為演出作檢討，Jason指Sophy的歌聲其實有其特質：“Sophy嘅歌聲有好多好嘢喺裡面，除咗好薄嘅頭聲之外，亦有一啲真音喺度，之前聽佢嘅歌冇特別留意到，係好嘢嚟嘅！再做多啲Training，會可以再有唔同嘅Vocal。”聽到Jason再次讚賞，Sophy即說：“今次袋咗好多嘢落袋，開頭唔識Jason，只係久仰大名，咁近傾偈做騷係第一次，但每次問佢關於舞台或者用聲嘅問題，佢都會幫手分析，呢樣嘢好少前輩會咁坦白同你分享。”