快如飛全力搏殺

本季賽事快煞科，跑完今仗尚餘一次便唞暑。今午六場草地形勢緊湊，季內未贏馬者必全力以赴，對此類馬可吼實。練者冠軍之爭，錢健明、馮耀正高下未分，要煞科賽始有分曉。是仗錢、馮廄各遣精兵上陣可重視。另路人馬蔡鎮威強駒應戰，料有馬贏。

蔡鎮威暫以二十九W排名第四，乃練者開倉後最佳成績。蔡廄今季養馬不算多，勝在部署得宜，出擊有把握，季內贏完可再贏，故受馬主青睞。今仗五駒列陣不乏精品，睇環境有力起孖，馬迷務必吼緊。

第一場：五六班千五米。“如意快駒”季內且休且戰，狀態保持得好。上仗任布利跑同程得第六，敗未脫節。此駒遇強愈強，拼後加強磨練，今仗易配高君濤主轡，幕後擺明車馬要搏殺。此駒後上有力，欣逢路合人強，值得優先考慮。

第三場：二班千二米。“盛通精神”季內同程已取兩捷，路有專長。上仗轉戰千八米不合發揮，敗難作據。拼後重新操磨，今次復爭千二米不同估計，起用田中正一操刀配搭不弱。憑路合人強，拼盡可爭功。

第四場：三四班千五米。“快如飛”季內跑同程開齋，質新馬跟得鬥得，走勢前後兼具。近期求減分，敗不足據。上仗千二米路短旨在熱身，今次增程正合腳法，起用張志立主轡配搭亦強。此子挾上仗四喜氣勢出擊全力搏殺，冀替馬匹勝回一仗。