佗住B女拍新片

余香凝：係母女共同回憶

前晚，余香凝(Jennifer)、蘇麗珊、張紋嘉、陳漢娜亮相新片《緣路山旮旯》首映禮，余香凝說電影本來在情人節上映，因疫情關係延期，但幸好又碰上七夕，所以很開心。她指看完電影後，打算相約家人到元朗“下白泥”睇日落，又提到當初導演找她演出這部電影的時候，仍未有BB。

Jennifer說：“其實呢套愛情小品電影，本身係安排喺情人節檔期上映，心惗係最完美，時間夾到啱晒啦。點知因為疫情嘅關係，到而家暑假先上映，但有另一番風味，而呢種風味就係叫做‘暑假味’，撞啱呢種天氣又熱辣辣，我哋可以做啲乜呢？就係可以揸車同屋企人周圍去囉，去香港啲山旮旯嘅地方遊車河飽覽景色。”

開始拍此片的時候，Jennifer才發現有身孕，最初跟導演說的時候，她還怕對方會換人：“點知佢又冇，佢話唔得，一定係你做喇！我哋快啲開機拍咗你先。”她笑指一邊拍、一邊肚子愈來愈大，幸好有冬天厚衫可以遮掩。

提到囡囡，Jennifer指她現在已經十四個月大，覺得這部戲是她與囡囡的回憶。她又大讃女兒頗有表演天份，會在Playgroup上跳舞。會否與女兒做幕前演出？Jennifer說：“如果拍幾個鐘廣告，或做慈善，好短時間我覺得可以考慮，但如果係拍戲長時間就唔捨得，同埋我唔會忍心佢拍喊戲。”另外，余香凝的胞妹、Mirror成員邱傲然(Tiger)緋聞女友余潔滢，亦有到場撐家姐，不過因要照顧媽咪而未有接受訪問。