昨日賽事總投注一百四十七萬

余健雄高中三元

昨日黃昏草地馬順利完成。是仗天晴地好，且戲碼較佳，五場總投注額共一百四十七萬二千元。頭場四五班角逐千二米，一對轉倉馬埋Q。麟廄“國金軒”由余健雄主轡，埋門力壓馮廄張志立“夠響紅利”率先衝線，爆出十五倍冷W。是場兩駒連贏派逾四百中者好分。“國金軒”前幾仗在錢廄連番落敗，近期轉投麟廄後一出即勝，贏來生氣重現。何華麟接手此駒即贏馬交代，余健雄應記一功。

第二場蔡鎮威廄贏“華英雄”。此駒季內沉寂一輪無建樹，經減分回氣後近期已有轉機。上次余健雄執韁落敗，拼後走馬換將由田中正一主轡。騎者憑較佳留放後上挫敵，跑完獨贏有六倍分頭不俗。“華英雄”季尾狀態回起，日後再次上陣仍堪重視。田中正一喜添頭馬，蔡鎭威廄連贏七期頭馬未斷纜。

第三場余健雄搏殺起孖。此子頭場爆完“國金軒”手風大順，是場騎張兆煊廄“勇強旋風”，以快放姿態輕取對手。此駒今季跑沙地戰績出色，尤其同余健雄更是最佳搭檔。今次首戰草地千八米出閘快步搶先，全程一氣呵成帶返終點，贏來無懈可擊。“勇強旋風”首戰草地表現犀利，成兆廄全材馬，料季尾還有一番功業。

第四場余健雄高中三元。此子於一、三場起孖後乘勝追擊，是場騎馮廄“天騏貓”，以無敵姿態取勝。此駒上次初出即拼，惜跑第三未能開齋。今次原裝人馬再來，臨場捧成頂頭大熱，騎者不負幕後所托，贏來無驚無險，替馬匹補中。馮耀正廄喜添頭馬，余健雄三元進帳，為季內成績最醒一次。

尾場黃世浩再爆李家輝廄“汪臣”。此雙人馬上次爆得杰，贏完小休再來。今次加磅出戰，黃世浩發揮得宜，以強橫後勁挫敵。人馬連下兩城表現出色，輝廄喜添頭馬，食尾餬埋齋。