鄭融開騷紀念入行廿年

鄭融日前接受娛樂新聞台節目專訪，明年就是鄭融入行二十周年，她透露將在紅館舉行紀念演唱會，並大談出道以來的感受。

鄭融直言對能夠在紅館開騷感到興奮：“今次有開騷機會係意想不到，如果平時冇做運動的習慣，可能會擔心體能問題。但我平時一直有做運動，生活習慣好有規律。加上疫情下好得閒，雖然可以成日叫外賣、放縱自己去食，但我話唔可以咁，我要挑戰自己食得好清，畀個目標自己，所以影海報時見到件衫咁少布，都覺得好好彩。”

談到李克勤和周筆暢於《聲生不息》中翻唱其代表作《紅綠燈》時，鄭融說：“當晚半夜同朋友一齊睇，知道克勤、筆筆在一個咁大型的舞台唱《紅綠燈》，我自己都好緊張，叫埋朋友一齊陪我睇。我冇諗過到副歌部分令我好感動，有毛管戙的感覺。有前輩翻唱係一件好有成就的事，多謝佢哋喜歡呢首歌，我覺得自己好幸運。”

談及紀念出道廿周年的紅館騷，鄭融說：“時間真係過得好快，人生第一次有一樣嘢係持續二十年。雖然我的產量唔多，但係每次樂迷都好鍾意、反應好好，令我覺得這二十年好豐富。我唔係一個好進取的歌手，依家好多事都預計唔到，唯有盡力畀心機去做好每一件事，其它的就交畀個天，迎接機會來臨。”