祖藍“唱衰”無線的眞相

王祖藍帶隊率藝員北上拍劇，卻涉嫌“唱衰”無線 ，大揭新人被導演欺凌、拍劇吃飯有得睇冇得食、見到滿檯靚餸，只諗到一個字：驚！

一班藝人平安到達上海，王祖藍舉杯恭喜大家完成隔離：“飮得杯落，勝嘅！”衆人舉杯，你眼望我眼；王祖藍又叫：“起筷！食飯！”又係你眼望我眼，巋然不動。“雖然我們在拍節目，但也是眞人秀，實景拍攝，不是無線的道具餸。一桌酒席擺在面前，點解唔食呢！”王浩信、張振朗等藝人才放膽起筷，祖藍又説：“放心啦，這裡不是無線，來到上海東方台了，飯是可以吃的！”跟着夾餸給王浩信。

“我們在TVB拍戲時，都是假的菜。”吳啟華在TVB多年，最有經驗了。王祖藍搭話：“人哋精，我也有一套。後來學乖了，讓助理幫我買幾個菜，放在那裡，眞的可以食一啲，這才入戲。唔使總是作狀扒飯唔入口咁假。呢處係東方台，不是TVB呀！狠狠地吃吧。”這位無線高層到了上海，似有“背地駡皇帝之嫌”了，但事實眞相呢？

阮兆祥、黎耀祥拍《雙祥見》節目時，亦分享過“道具飯”真相，指會有人食，亦有許多人唔食。“我拍《皆大歡喜》時，八個演員食飯。”阮兆祥爆料：“冇理由得三個餸吧，起碼七、八個餸。但又發覺食唔晒，好似唔環保，好嘥。於是公司決定，四個餸係眞嘅、四個餸係假嘅，拍出來都有好靚效果。”

又唔好講得電視台咁刻薄。早期眞係炒幾個餸上桌，但藝員都唔食嘅，只因衛生問題：由早上八、九點擺好佈景，到排戲、燈光、走位；眞的餸菜擺了八、九個鐘，但周圍沙塵滚滚；道具水亦係眞水，但大家都唔敢飲。東方台演戲用眞餸，唔奇；奇在係現場炒的麼？

高 梁