李幸倪掛念家人眼濕濕

日前李幸倪(Gin)作客TVB娛樂新聞台節目《StarTalk》，談推出新歌《剛好》感受。Gin說：“歌迷成日私訊我，想我再唱多啲R&B曲風嘅歌，但要等時機，呢幾年專注唱抒情歌，其實內心好想唱多啲R&B同節奏感強嘅歌，依家時機終於到，所以同T-Ma合作推出《剛好》。我本身都好鍾意呢類型嘅歌曲，臨瞓之前我有個歌單，要聽一啲好Chill同R&B嘅音樂先瞓到，咁樣會覺得好舒服，冇壓力。”

談到受疫情影響三年未見家人，她說：“疫情下過咗三個好唔同嘅新年，每逢過年自己一定請假返去馬來西亞過年，或者帶屋企人去旅行，已經變成我哋屋企嘅傳統。但呢三年嘅團年飯都係隔住個屏幕食，我同家姐，仲有媽咪喺三個唔同嘅地方，問吓佢哋食啲咩，我有影吓自己食咩，真係食到眼濕濕，呢幾年真係過得好難忘。”