江海迦唔放棄紅館開騷

江海迦(AGA)日前接受TVB娛樂台專訪，被問到再三面對紅館演唱會延期和取消的感受。她說：“其實依家心態已練得好好，的確好無奈，好似又要再等的感覺。歌迷好好，為我集氣，成個團隊的熱誠令我好感動，所以之前未到最後一刻，我仍然堅持排練。依家再重新入紙，希望在一個最好的時間送上演唱會畀大家。”

紅館演唱會宣佈取消後，當時有傳AGA情緒出現問題，她表示：“我其實一早同公司攞咗大假，諗住開完演唱會之後可以陪屋企人，因為我父母從澳洲返港睇我的演唱會。我覺得今次係塞翁失馬，因為我真係兩年冇見過佢哋。我係一個工作狂，之前錯過好多時間，又犧牲同家人的時間，所以今次真係要好好珍惜。所以之前的假期，我真係做返女兒，過慢活生活，可以同父母飲咖啡、坐一個下晝，好開心。”談到明年是她出道做歌手十年，AGA說：“我諗我最有成功感的地方，就係冇放棄。細個做好多事都係三分鐘熱度，好開心到現在都可以堅持做音樂。（出道至今每首歌都係自己寫，有冇壓力？）其實真係有壓力的，因為有好多音樂人寫到第三、四隻碟，就可能會遇到樽頸。不過我好好彩，感恩坐低又可以寫到、瞓低又有靈感。”