才貌雙全白燕姐

陳玉屏，何許人？冇人識。白燕？叔父輩何止識，直頭如數家珍。上世紀五、六十年代，白燕雄霸粵語片銀幕賢妻良母，端莊嫻淑，溫順賢良，幾多叔父發夢想娶佢做老婆。

十六歲出道，十八歲嫁人。抗日戰爭激於愛國熱情，拍攝不少抗戰片，演技日趨成熟。戰後有感粵語片七日鮮充斥，粗製濫造，與吳楚帆、張活游、黃曼梨合組中聯影業，專拍高質粵片，所遺佳作頗多。

白燕所飾，每每感人。其靚麗外形，磁性鼻音，親切而性感，不似演戲，直是隔籬嬸母。其時社會困頓，生活艱苦，觀眾感同身受，天下第一賢妻良母，非佢莫屬。縱觀影壇，有佢演技，冇佢咁靚；有佢咁靚，冇佢演技，至今無出其右。

西門有叔父曾於影圈行走，對白燕阿姐印象極深，無他，佢慣用片場語言，釣蝦拆蟹，頗有獷男之風。

卅五年前今日，燕姐於香港逝於骨癌，享年六十七。

西門公子