拍新劇有梳化激情戲

湯洛雯唔敢畀男友睇

湯洛與黃庭鋒昨日出席原創劇《OPM》記招，兩人曾在《雙生陌生人》中合作，今次則是擔正男女主角，湯洛雯形容是新配搭，會有感情線，以曖昧及友情為主。

湯洛雯（靚湯）、黃庭鋒、張寶兒、孫慧雪與林穎彤等昨日出席myTV SUPER 六周年原創劇《OPM》的發佈會。首次演劇集第一男主角的黃庭鋒，在劇中與靚湯有微妙的感情線。但其實兩人在新劇《雙生陌生人》中已有合作，庭鋒演馬德鐘的年輕版。靚湯形容今次是新配搭有新鮮感，更因拍劇學識大量金融知識，儼如上了一堂經濟課。

靚湯在劇中扮演一名有六歲兒子的師奶，與平時演慣的靚女角色有好大出入。靚湯表示唔介意要演媽媽的角色，比起牢記金融術語更容易應付。她說：“角色原本是大學生，唔覺意有咗BB之後就焗住結婚和做媽媽，後來就想追回湊小朋友時失去的時間，其實都反映咗時下好多女性的想法。”

首次做男一的黃庭鋒坦言有壓力：“收到劇本時已緊張了半個月，因為角色有不少感情大爆發的場面。”靚湯卻大讚庭鋒演出精彩：“我知道佢係主持出身，所以記稿方面非常犀利，記對白功力好勁。反而係我對金融知識完全不懂，庭鋒由零開始教到我識，我好似在上經濟堂一樣。他似一本教科書，畀到我有信心和說服力。”庭鋒謙稱自己對金融也不熟悉：“只係監製選角時要求找一個不懂得金融的人去演，我剛好完全符合，就好似角色一樣慢慢去學。”

庭鋒更劇透靚湯與黃子恆在劇中有一幕梳化激情戲，會否唔畀男友馬國明睇？靚湯說：“我自己都唔敢返睇，所以唔知效果是怎樣。拍攝前我有向他提過有這一場戲，相信他都不太介意。反而拍劇時要我穿唔少低胸衫，我好怕會走光嘛，但為角色要曬事業線都冇計。拍完之後，我好有衝動想燒晒所有啲衫。”