多臣輕磅一放到底

澳馬今期賽事只跑周六一次，草地日馬共編六場。是仗出馬較踴躍，逾半場合出足十二匹滿額，但有個別場次多匹後備馬未能列正選，請纓無路只得留待下次。騎師人手限米煮限飯，除中野省吾續停賽，高君濤亦服刑一日，全數共十三人出賽“地莊”見晒。缺少高君濤此位冠軍人物，正是“誰人代替佢地位”，令騎師陣營競爭更激烈。說實在目前澳馬場除馬匹質素參差，騎師整體水平亦有頗大差距。看龍虎榜排名便知，前領者贏馬數字同榜尾者計，相差十萬八千里。今仗騎師配搭大兜亂，逾半場合海軍鬥水兵格局，形勢暗湧重重，揀馬投注須仔細分析。

牌仔特蘇日近期頻有斬獲，上仗替錢健明廄勝出“馬主聯盟”，現頭馬增至四場，排名尾四不用“墊底”。特蘇日去年十一月才獲發牌，十二月十一日首戰即憑劉志森廄“聖靈之都”開齋。該仗直路騎來“舞龍咁舞”可殺低對手，除馬匹贏質素，騎者初次出賽亦鬥志十足。此位內地騎師談不上騎功好，但重磅馬交其主轡有着數，因獲減十磅優惠，故受練者歡迎。出賽四個月取四冠兩亞十二季，成績比起多位出道更早的同儕猶勝一籌。今仗高君濤停賽，無疑打亂了部分練者出擊計劃，戰駒須另覓人選搏殺。第六場四班千二米，李家輝精品“多臣”交牌仔特蘇日主轡，應具重視價值。此駒近三仗未竟全功，每次埋門輸少少只跑第二名，似有點欠運。今次起用十磅仔出擊，復跑起家路程不同估計。騎者出閘搶先，憑輕磅之助可一放到底。此雙人馬不妨盯緊。