悲劇聖手譽華南

上回講完“東宮”余麗珍，忽又想起惡家姑黃曼梨。粵語片中惡女人，惡到刻骨銘心者，恐無出其右。然佢亦有兩面，演屢受人欺之冤屈婦人，片場上下亦同聲一哭，其戲假情真，也絕對無出其右。

瑪麗姐，乃曼梨姑番名。佢香港名女校出身，十七歲考入電影公司，僅十年餘，即成銀幕台柱，享譽華南。十八無醜婦，曼梨姑亦一度玉女過，小家碧玉，大家閨秀，復以賢妻良母定型。

許是天生苦情相，佢演悲情，除非鐵石心腸，不淚目者幾稀矣！昔日觀影，女士總濕幾條手巾，“佢仲慘過我！”由是自我開解，甘於現狀。於艱困日子，此無疑係心靈解藥。曼梨姑“悲劇聖手”之名，刻入史冊。

曼梨姑一生拍片三百多部，善惡全包，均臻極致，無人能及。當年曾與陳皮梅、黎灼灼一眾姑媽演員結成“十二金釵”，包攬“媽”級戲份，與玉女輩分庭抗禮。廿四年前今日，曼梨姑以八十五齡仙逝。

西門公子