可嵐為囝囝轉投飲食界

香港開電視新節目《有種老闆娘》由可宜主持，本星期邀請了可嵐、吳日言、鄧洢玲等擔任嘉賓。在昨晚播出的一集由可嵐分享進軍飲食界的艱辛和心路歷程。

作為單親媽媽的可嵐，由歌手進軍飲食界，成為私房菜及日式餐廳老闆娘，箇中原因跟兒子尤俊有莫大關係。

可嵐表示開日式餐廳娘，全因囝囝對壽司有情意結。可嵐在節目中經常將兒子放在口邊，盡顯愛兒心切，自言好少時間陪兒子的她，覺得對兒子有一份虧欠。

在節目中，可嵐大方邀請拍攝團隊到屋企家訪。鏡頭前可嵐與兒子尤俊感情深厚，二人對答流露出溫馨母子情。當兒子表示有自己房間時，可嵐不諱言說：“以前一齊瞓，依家各自一間房，有時我都會叫佢過來陪我，但佢唔肯。”問可嵐會否搵個另一半陪伴？可嵐直言習慣了兩母子的生活形式，暫未適應身邊多一個人。

可嵐前夫曾做飲食業，亦深知飲食業難做，但為何可嵐仍堅持進軍飲食界？她表示：“原先冇諗過做飲食業，一八年演唱會一波幾折，幸好最後有賺到錢。可能我太專注演唱會，到演唱會後，補習社話覺得阿仔有少少過度活躍症，我好擔心、好內疚，想畀返多啲時間陪囝囝，咁啱屋企附近有間舖早上喺冰室、晚上關門，佢哋建議我可以用來賣糖水。”