拋下女神包袱豁出去

陳自瑤疑節目中爆粗

遊戲節目《思家大戰》昨晚播出新一集，嘉賓除了平時負責為節目暖場的“一蚊Joe”，其他全是以往多集的輸家，眾人組成復仇者聯盟，揚言要玩謝李思捷。

李思捷主持的無線遊戲節目《思家大戰》在昨日播出新一集，嘉賓有林盛斌 (Bob) 率領的“冇事復仇隊”，隊員包括吳若希、馮盈盈、麥美恩及林穎彤；另一隊則是由阮兆祥率領的“條氣唔順隊”，隊員包括陳自瑤、姜麗文、泰臣及“一蚊Joe”游莨維。

今集嘉賓除了平時負責為節目暖場的“一蚊Joe”，其他的全是以往多集的輸家，今次眾人組成“復仇者聯盟”，揚言要玩謝李思捷。

話明復仇，當然充滿火藥味。單是 Chit Chat 環節，嘉賓們已鬥講條氣唔順及復仇原因，出盡全力圍攻思捷，當中以陳自瑤“最有道理”兼最激動。她扮晒勞氣咁投訴思捷：“明明嗰條問題個字係聞，但你就講咗問，咁就令到我聽錯晒，仲話係最佳男主持喎。”全場即噓爆兼嗌回水。最後兩隊非常合拍，齊齊對住思捷大嗌：“我哋唔係要攞五皮，係要收你皮！”全場大笑。

問答環節氣氛亦同樣熾熱。馮盈盈、姜麗文未埋牙先來眼神過招，互相大騷“狠樣”。雖然兩人戰意高昂，但可惜先後答錯問題，有頭威冇尾陣。麥美恩、泰臣則鬥曬古怪猙獰表情，意圖擾亂對方，這班“復仇者”可謂相當搞鬼。

玩得最落力的非“綜藝競技女王”陳自瑤莫屬。當要回答“喺街踩到狗屎，第一個反應係講一個咩中文字”時，她先是怕醜地說：“唔出得街喎！”但為了能成功報仇，她不惜拋下女神包袱豁出去，在思捷耳邊細細聲講出答案，期間更露出尷尬表情，相當吊觀眾胃口。