唱歌拍劇兩不誤

王灝兒自比Lady Gaga

王灝兒接受TVB娛樂新聞台專訪，除了分享新歌製作感受，亦談及過去一年拍劇的體會，笑言自己好似Lady Gaga，唱唱吓歌才發現自己好鍾意演戲，於是決定兩件事同步進行。

王灝兒(JW)日前接受TVB娛樂新聞台節目《StarTalk》專訪，分享推出新歌感受。JW去年以拍劇居多，較少推出非劇集歌曲，她說：“我想趁後生、趁有機會的時候，完成自己想做的事，例如嘗試拍劇。上一年有機會接觸到拍劇，就擺咗好多心機落去，希望做得好好。但其實中間一有空檔，我就秘密錄音同製作歌曲。新歌《納斯卡線》其實在一年前已經整理好，但我希望成件事完整啲，想有晒全年的音樂計劃才一次過推出，唔想出一首歌之後又停下來，不如留返今年進行。大家唔使擔心，我唱歌同拍劇兩樣嘢都繼續會做，好似Lady Gaga咁，都係唱唱吓歌，才發現自己好鍾意演戲。所以我覺得鍾意就要嘗試，對我來講，兩件事可以同步進行。”

JW表示今次推出新歌有種畢業後工作的感覺。她說：“過往仲係新人的時候，好多事都交畀公司處理，今次好多事都親力親為。要咩類型曲風、搵咩音樂人同班底、拍MV搵咩導演，全部自己搞，呢個過程自己都學到好多，但就有點壓力。今次自己爭取做返女主角，因為對演戲越來越有興趣。”

JW透露學完彭秀慧的演藝課程後，開始發覺自己好鍾意演戲，所以希望參與自己新歌的MV部分。她說：“MV中間有一場鬧交戲，我同男主角本身係冇任何對白，但我去到現場同佢Jam歌，效果好好。”

談到去年的拍劇實戰經驗，JW說：“演戲係累積經驗。我之前好怕羞，所以以前拍MV真係唔敢望住人哋對眼。依家覺得拍劇好好玩，因為可以重現另外一個人的生命。拍《痞子殿下》時有好幾場戲要喊，但我拍喊戲真係覺得好難。我親眼見過周嘉洛、陳瀅同朱敏瀚拍戲，佢哋一拍喊戲，鏡頭一拍過來，眼淚自然就流出來，我覺得佢哋好犀利。唔知我係咪眼乾，就算我滴眼藥水，滴勁多都冇淚出、吸晒！小寶教我擦少少薄荷膏在一對眼下面，我擦咗勁多，連眼妝都開始冇，都係喊唔到，真係好大打擊。後來慢慢我發覺最大問題係原來我好鍾意講嘢，未埋位之前同攝影師、同燈光師吹水！其實應該要培養感情，慢慢進入狀態、入戲，咁樣自自然然就可以有情緒。所以我決定拍戲前唔會再同其他人講嘢，咁就唔使依賴眼藥水、薄荷膏啦。”