自爆求婚秘婚私隱

蕭正楠唔怕跪榴槤

蕭正楠與黃翠如對感情生活向來十分低調，但他日前接受好友林盛斌(Bob)主持的節目《人夫放假約出去滾》訪問時，卻不怕激嬲老婆，自爆談當年與老婆黃翠如撻着及求婚經過之外，更大爆翠如不少烏龍事，阿Bob聽到都笑到飆眼水。

蕭正楠為了支持老友Bob主持的節目《人夫放假約出去滾》，不惜自揭感情生活：“我同翠如喺一四年合作拍劇集《師奶Madam》時撻着的，其實我當年冇諗過要追求佢的。我哋合作拍嗰部劇都拍咗大半，我對佢都冇乜Feel，因為好忙，日日開工，每日都要記劇本，唔得閒理佢，但佢有啲待人處事嘅細位會慢慢記喺腦中，有次有人做錯事畀導演鬧，翠如去安慰對方，仲要唔係一次半次，都見咗三五七次，覺得佢幾好心哋喎，同埋佢拍呢套戲又辛苦過我，佢仲捱得過我，瘦到不得了，慢慢加啲加啲，到差不多劇集拍完，發覺見唔返就有種掛住嘅感覺。”

蕭正楠坦言向翠如第一次求婚時是失敗的：“二○一八年我哋秘密喺新西蘭結婚，（如何求婚的？）當年我同翠如去英國旅行，去玩最高嘅過山車，當過山車升上去時，我就偷偷哋拿出戒指，打算衝下去時就同佢求婚，點知幻想同現實係兩回事，上到最高處時，翠如大嗌好驚，望都冇望我一眼。之後我哋去到利物浦，無心插柳見到一間莊嚴又寧靜嘅教堂，於是就走咗入去，我再拿出戒指向翠如求婚，當時翠如開心到喊。”蕭正楠自認係鐵漢，平日好少人前落淚，點知那次求婚及之後在新西蘭結婚時都忍唔住喊了。

另外，蕭正楠又自爆在竹篙灣隔離中心接受強制檢疫九日，臨走時煮了好多餸菜放在雪櫃，等翠如可以翻熱來吃。他笑言：“我喺裡面九日，我返出嚟時，佢夠膽死炒發臭嘅豬肉畀我食。”身旁的阿Bob聽到後笑到飆晒眼水。

蕭正楠在這節目播出街之後，馬上在社交平台留言：“同主持老友不知不覺講咗好多私人嘢，最後先醒起錄緊節目，好彩而家唔係食榴槤嘅季節，屋企亦都唔多玻璃製品，如果大家見到我有啲咩受傷，一定係我自己唔小心整親，同任何人無關。”黃翠如看到後亦回應道：“你意思係叫我開嚟睇吓，到底你講咗咩？”阿Bob加埋把口，向翠如推介道：“唔係講笑，真係笑到流眼淚。”