陸浩明公然鹹濕肥媽

由肥媽和陸浩明（6號）主持的《煮·野食》，本月十五日和前晚播出的第五及第六集，二人繼續在落馬洲“煮野食”。

6號延續黑仔王本色，先是撐艇仔出海撈魚，靠撻肥媽朵獲漁民送上一條白鯽魚，可惜最終因漁網破了一個洞、眼白白看着鯽魚游走。直擊“走魚”情況的肥媽更笑至合不攏嘴。繼第四集落睡蓮塘摘睡蓮搞到底褲都濕埋，6號今次再度遭殃，打算單腳踩斷荔枝木，奈何荔枝木堅硬無比，令其膝蓋受創。

這兩集“母子檔”繼續玩互窒，6號看見有雀鳥飛過，口花花叫肥媽張開手扮大鵬展翅保護他，肥媽反駁：“你當我係大麻鷹、大雞乸呀？” 6號不但冇收口，繼續撩肥媽：“你梗係唔係啦，你係大鵰！”肥媽聞言勁勞氣作狀拿筷子打6號謂：“你係咪想死⁈”

除了口花花，6號更嘴多多借啲意想錫肥媽玉手，不勝其煩的肥媽只能扮扯火務求阻止6號再度搞搞震：“你就嚟結婚喇！唔好咁鹹濕啦，連七十歲都唔放過，成日博人懵！”