被五子求愛奇招玩到傻

馮盈盈一招反勝

馮盈盈為綜藝節目《七線人棄王》擔任嘉賓，在節目中獲五子先後以五大不同戰術發動求愛攻勢，向來大情大性的盈盈被逗得仿如坐上情緒過山車般歷盡高低起跌。

由陳俊堅、鄭雋熹、程浩駿、林浩文及姚宏遠五位七線藝人擔大旗的TVB綜藝節目《七線人棄王》，一連十集足本版已上架。自從“人棄五子”成功搲到製作預算後，除了瞓身自嘲、自殘及炮製無厘頭短劇搶收視兼搶眼球外，更瘋狂自肥！繼之前找到五名靚女何依婷、林穎彤、林秀怡、王菲及黃嘉雯去荒島露營，再搵來凍齡女神康華姐做Miss玩體罰，之後更攞正牌溝港姐冠軍馮盈盈。為咗口氹掂馮盈盈，五子各出奇謀，可惜最終“有幸有不幸”，有人慘遭負評，有人全程冧到盈盈笑不攏嘴。

在節目中，陳俊堅、鄭雋熹、程浩駿、林浩文、姚宏遠先後以整蠱、細心、銀彈、笑彈及肉彈五大不同戰術向盈盈發動攻勢。向來大情大性的盈盈，則被五人逗得恍如坐上“情緒過山車”般歷盡高低起跌，一時嚇到眼凸、一時滴汗、一時又開心到見牙唔見眼。

五子之中，以俊堅最有“驚”喜。為求突圍而出，俊堅先後為盈盈奉上電動曱甴及電筆，嚇得她兩度放聲大叫，更狠批俊堅“小學雞”：“佢真係好幼稚！”以天使造型登場的鄭雋熹，則以極盡細心的冧女三寶，包括DIY愛的裝飾、極盡體貼愛的承諾以及甜言蜜語心意卡向盈盈大獻殷勤。被心意卡，誠意打動的盈盈，亦對熹熹讚不絕口：“你張咭寫得太好喇！正中心坎，非常到肉。”

姚宏遠雖然犧牲“色相”打大赤肋騷肌上陣，但盈盈似乎唔多受落，嚇到眼凸之餘，更直指男人安全感與着衫件數掛勾：“我覺得佢應該成日咁樣唔着衫出去溝女，唔係好可靠，睇吓就好喇。”至於程浩駿亦相當進取，有備而來的他瞄準盈盈曾公開表示理想男友條件之一是月薪八千港元以下，故自備糧單讓她看個夠，“豁出去”程度與姚宏偉不相上下。

五人之中，以林浩文戰鬥力最為強差人意，不但資料搜集唔足夠，想以笑話打動盈盈的他，即使出動“魔鬼魚”幫拖依然無功而還，相當失禮。遭五子弄至翻天覆地的盈盈，反而一招扮海獅拍手，成功將氣氛炒熱。

玩完“單對單”求愛，五子再合體玩Live Band唱情歌《分分鐘需要你》冧盈盈，再度以細心絕招成功吸引女神關注。專誠為女神學繪畫的熹熹，唱歌期間送上盈盈的港姐冠軍Look素描畫乙幅，成功令她喜上眉梢，氣氛既溫馨又感人。