護鯊鬥士本奇利

彼得本奇利，原本冇人識。大導演史提芬史匹堡用咗佢劇本，等佢一片成名，此乃經典之作《大白鯊》。此片讓世人得知大白鯊之可怖，史公因之名利雙收，亦帶挈本奇利荷里活揚名。

本公天生對鯊好奇，兒時遊海島遇鯊，即時上癮，跡近癡迷。上世紀六十年代，偶見報載漁民捕得兩千餘公斤大白鯊，興奮之至，扯起條筋，要為大白鯊豎碑立傳。無奈搵食緊要，寫書一事暫且擱置。

本公乃書香世家，祖孫三代連佢都係作家。青澀期早已喜舞文弄墨，時投稿報刊。後從職報刊，曾係美國總統文膽，惟從未搞過小說。此兩千公斤大白鯊，魂縈夢繞。直至七十年代，始疊埋心水，一氣呵成。史匹堡公一見鍾情，無論真假，拍咗至算。

捕鯊殺鯊，古仔而已。本公實係護鯊鬥士，曾與妻乘籠落水觀鯊，慶祝四十年婚齡。十六年前今日，本奇利公駕鶴，年六十六。

西門公子