聯安興旺一網打盡

今午六場草戰，形勢兵兇戰危，挨年近晚賽果容易古靈精怪，買馬要執生。上周六高君濤五福臨門，現以三十九W大幅拋開對手，半季未完冠軍已坐定粒六。今仗騎足六場續有機會數餬。練者賀蘭杜夫屯重兵，睇環境會開殺戒。

賀廄現以八W排名第七，成績不過不失。今季此廄兵馬驟增，目前除一批舊馬可用，有多匹質新馬湧現，倉口實力較上季平均，料賽至埋尾排名可躋身前五位。今仗大軍壓境，馬房有搏殺手影，臨場吼緊。

第一場：特別條件賽千五米。“聯安百勝”對前四仗突如其來殺入冷Q，及後連仗無功而回，看部署旨在替馬匹減分。拼後重新打磨，今次回配曾入位的中野省吾操刀，有搏殺手影。此駒質新未用盡，今於此群作賽計馬有微利。憑騎者熟手執韁，可重施故技。

第四場：二班千二米。“聯安興旺”千二米專家，迄今有五勝八位紀錄，賽績不俗。前仗艾比跑同程屈居“飛龍在天”腳下，雖敗表現仍佳。上仗易配特蘇日未能發揮致敗，拼後再換牌仔梁曉傳操刀。此子獲減十磅，憑磅輕之助，冀一網打盡。

第五場：三四班千二米。“年年駿”上仗同程出擊惜飲恨梗頸，但表現有長足進步。拼後加強磨練再來，原配劉永康搏殺，遇同組對手弱旅居多，憑騎者摸熟馬性，可打開來澳勝門。