昨晚賽事總投注近二百七十六萬

梁曉傳喜中三元

昨晚沙地賽完結。是晚戲碼較佳，六場總投注額共二百七十五萬九千元。

頭場四五班混戰，余健雄騎張兆煊廄“勇強旋風”先拔頭籌。此雙人馬上次短途跑第二未能贏馬，拼後小休再戰，今次原裝人馬增程出擊。騎者出閘快步搶先，全程領放一口氣直帶到尾輕鬆挫敵。跑完獨贏不足兩倍，被人大注扑中。“勇強旋風”質新進步，今仗開齋，騎、練居功。

第二場呂韋勒打疊贏高廄“神速縱橫”。此雙人馬上次初出即勝，贏來無懈可擊。拼後原配再戰原程，騎者今次照辦煮碗，出閘搶先一步，沿途領放直帶而返。人馬取得連勝，練者摩利高喜添一W。

第三場牌仔梁曉傳贏馬。此子替王君適廄“東方盈悅”執鞭，以快放本錢大勝對手。此駒已連敗多場無建樹，今次起用牌仔減磅搏殺。騎者出閘搶先，全程愈放愈有，替馬匹勝回一仗，跑完獨贏近七倍買中好分。梁曉傳、王君適攜手建功。是場錢廄“艷姿媚”轉倉後首戰，獨贏捧成兩倍。張志立騎至末彎馬不前，大熱死火輸得人多。

第四場李森馬房開齋。練者今季苦戰多月未贏馬，旗下“科高騷”今仗由老搭檔高君濤押陣，以較佳留放後上擊退大熱門“白龍駒”，替馬匹取得新年首W。李森今季開勝門，騎者居功。

第五場梁曉傳起孖。此子騎譚文就廄“大魔頭”以較佳留放，後上撼低廄侶“忘不了”。此雙人馬上次一三五○米得第二未竟全功，今次原配增程再戰。騎者汲取上次經驗，出閘跟住第二位，入直路發力衝剌，將對手一網成擒。譚廄是場包辦馬房Q，梁曉傳喜中孖寶，收穫不俗。

尾場梁曉傳喜中三元。此子贏完“東方盈悅”、“大魔頭”再接再厲，是場騎王君適廄“根本英俊”，以快放姿態一口氣直帶到底，替適廄完成起孖任務。梁曉傳從騎個多月後首次中三元，成績一枝獨秀。