揶揄Tyson半裸賣廣告

張敬軒險被剝衫

張敬軒演唱會前晚舉行到第四晚，適逢Boxing Day拆禮物的大日子，軒仔請Tyson yoshi及泳兒任嘉賓，加上軒仔兩度“安哥”，觀眾非常開心滿足。

在嘉賓出場環節，軒仔介紹Tyson yoshi（程浚彥）時表示兩人的相遇好奇妙：“我係要訪問佢，但佢激嬲我，竟然同我講細細個就聽《孤單公園》口架啦！之後我膽粗粗問佢，你來做我嘉賓好不好？”現場歌迷已經醒目地估到係Tyson，歡呼四起。Tyson帶住一枝大型玩具槍上台，甫上台就向軒仔發射，十分頑皮。軒仔反搶玩具槍想報仇，但因為唔識點開槍，最終失敗。軒仔之後就話“口渴”問工作人員攞水飲，估唔到係攞出Tyson最近半裸爆肌代言的冰涼水。軒仔飲咗一啖後笑說：“嗯，幾好味！”Tyson笑到唔識反應，軒仔又話：“為咗你，我特登去買呢個牌子的水來飲，我到香港咁耐未見過有裸男賣廣告，今日Boxing Day， 你着件T恤上台，係咪準備畀我拆禮物呀！”觀眾即時起哄叫Tyson除衫，Tyson就跑過去拉軒仔外套上面的打結，笑說：“你似拆禮物多啲喎！”又叫大家唔好信飲佢代言的水會豐胸，非常搞笑。

軒仔謂這次寫演唱會流程時發現好多歌多年來只唱過一次半次：“既然係聖誕節最後一晚，想唱一首未唱過的歌。但呢首歌一個人搞唔掂，想搵佢來幫我。我同佢好有緣，二〇〇五年舊唱片公司人事變動，我被投閒置散，宣傳錄音又少、冇收入，恩人周國豐叫我去做港台節目，一份工做DJ、一份TVB八頻道做V報娛樂新聞。呢段日子好難忘，港台返工第一日就收到呢位歌手第一隻派台碟《感應》！”

泳兒上台後已經開始眼濕濕，她說：“多謝你！台下聽你講，我已經好感觸。我第一隻派台碟到你手上時，我冇乜人識；第一個小小演唱會，你都願意幫我做嘉賓。”隨即她已熱淚盈眶，軒仔幫忙擦眼淚之餘，再鼓勵她：“每個人也是由一張白紙開始，只要肯努力，聽眾耳朵係雪亮的，你一定會有好成績！”之後兩人合唱軒仔極少公開演唱過的《石徑》。