與家人睇雪浸溫泉

陳婉婷難忘聖誕旅行

陳婉婷自從離巢外闖當網紅後，現時以自由身接演出，並與ViuTV以部頭形式合作節目。日前她就聯同三名KOL為某直播平台拍攝廣告，透露這是今年最後一個廣告工作。

香港藝人陳婉婷(Hebe)、香珮汶、Angela及小豆（KOL)日前為某直播平台拍攝廣告，Hebe笑言是今年最後一個廣告工作，作為誠心教友，聖誕節對她來說意義重大。她預告當日會到道風山參與宗教活動，與家人睇《聖經》了解教義：“因為聖誕節係耶穌出生的日子，我細時好多時會同教會朋友過，但係大個後或者做嘢之後少咗參與。近排因為好朋友關係，令我重拾宗教，所以今個聖誕我會同好朋友、屋企人去道風山度過，一齊睇聖經慶祝。”

Hebe於一九年與無線約滿後離巢外闖，卻因為疫情而嚴重影響收入，她其後做網紅靠直播自救，但她表示從無後悔離開大台：“當時月入有萬幾蚊已經算多，慳住用都可以維持到基本生活開支，最差時連一千蚊都冇；本身想搬出來獨居，最後都要撻訂。不過，我又冇後悔當初離開舒適圈，因為我想試多啲唔同嘅嘢。依家係自由身，同ViuTV以部頭形式合作，農曆新年會播出真人Show《家務戰場》。”

Hebe表示以前掛住搵錢，放棄了與家人聚天倫的時光，所以當年離開TVB之後第一個聖誕節就同家人去日本慶祝：“當時係疫情之前，我第一次睇到落雪，一邊睇雪一邊浸溫泉。舊時淨係聚焦工作，好怕離開香港會錯失機會。而且我當時冇乜積蓄，所以足足七年都冇同屋企人去過旅行，到今時今日大家仲會提起，真係好難忘。”

近年做直播主播旺丁又旺財，但Hebe就話自己唔識買貴價禮物、唔會亂咁花錢：“我開派對買禮物，大家都唔想要，諗住實用啲買頸巾、充電器，但又被人嫌棄！現時大家仲未可以去旅行，所以我一定會做直播同粉絲見面，感謝大家一直支持，令我來年都可以繼續追夢。”

同場的香珮汶就話今年直播收入不俗，所以豪花五位數買禮物贈好友：“大家今年唔可以旅行，所以好多派對邀請，買吓買吓都成萬蚊！不過依家疫情幾勁，大家要留意。而且大家餓咗聚會咁耐，要小心啲唔好飲醉，有咩蝕底就唔好啦！”