搵馴獸師調教愛犬

李靜儀順道行山打卡

李靜儀近日出新片，原來早前她趁不用工作，膽粗粗帶同寶貝狗去挑戰行山，更邀請爆紅超級馴犬師Eric Ko邊行山邊調教她的愛犬，結果狗狗非常聽話，全程好合作。

李靜儀(Heidi)近日雖然忙於為主演的新片《假冒女團》做宣傳，但她閒時也有拍片放上Youtube頻道與粉絲分享日常生活點滴及所見所聞。近日她再出新片，原來早前她趁不用工作，膽粗粗帶同寶貝狗“紅豆妹”去行山，更邀請紅爆Youtube界的馴犬師Eric Ko同行，一邊行山一邊調教“紅豆妹”。

片中所見，Heidi拖住紅豆妹密密行，又找靚景打卡影靚相。她表示︰“行山係疫情後發掘的新興趣，見識到香港有很多好美麗的地方。之前未試過帶紅豆妹行山，今次係第一次。我想帶紅豆妹去多啲唔同地方，一起儲多啲美好經歷。因為狗狗生命係好短暫，希望與紅豆妹有更多美好回憶，對於我來講係十分珍貴。”

提到找來Eric一齊行山的原因，Heidi笑言因為“紅豆妹”平時非常百厭，要邀請對方幫手“教囡”。她笑說︰“紅豆妹本身有啲唔好習慣，好似帶佢出街，見到有其他狗就想撩事鬥非，發出唔友善聲音。所以今次就膽粗粗約Eric去行山，順便調教紅豆妹。出發前都驚佢見到其他狗會唔受控制，唔知紅豆妹可能知道Eric好厲害，而且氣場好大，所以紅豆妹全程好聽話，其實紅豆妹好醒目，識得揀人去欺負。”

Heidi坦言今次旅程非常難忘︰“今次特登揀東龍島塔門，因為我好細個去過一次，係好輕鬆。今次我去埋另一邊白崖，比我想像中崎嶇同辛苦，有好多好斜梯級上上落落，整日都行咗萬幾步，好累。紅豆妹就更加犀利，佢未試過行咁多路，佢一返到屋企即刻攤上梳化瞓着咗。”Heidi又大讚Eric︰“去到後半段大家都好累，Eric好有紳士風度，主動幫我揹紅豆妹，又要拖住自己隻柴犬Kiko，真係辛苦晒Eric。”