莫特上校路合檔佳

今午上演本年度壓軸戲，跑罷至明年一月二日才有賽事。今年埋尾一戰，練者賀蘭杜夫屯重兵出擊，馬房守齋一輪擺明要標尾會，馬迷不妨吼緊。

賀蘭杜夫今季養馬二十匹，廄內兵源實力尚算不弱，但迄今取七W成績普通。練者部署出擊一向有計劃，喜歡謀定而動。早排攻勢過後已守齋多期，今日年度壓軸戲起兵搏殺，全日共十一駒分途出擊，睇環境有馬贏，值得看重。

第二場：四班千二米。“莫特上校”上仗千五米拼入三甲，跑來頗有衝勁。拼後小休再戰，今次縮程跑千二米曾贏馬途程應合腳法。“莫特上校”計班次有微利，跟得鬥得，改由中野省吾操刀配搭更強。憑路合檔佳，可替馬匹勝回一仗。

第三場：三班千二米。“精選名駒”上仗高君濤跑同程贏得出色，人馬表現夾檔。拼後加強磨練，論態有增無減。“精選名駒”同程首本，跑順鬥後勁煞食。今次續由高君濤主轡配搭堅強，遇同組對手無多，形勢大好，有力添食。

第四場：二班千五米。“聯安神將”季內無甚建樹，但馬匹連敗已減分，現居此組作戰應有着數。“聯安神將”上仗沙地不合發揮，敗未可據。今次復爭千五米應會有計。此均速馬直路衝刺煞食，今遇同組強手不多，出閘跟貼對手，鬥直路可一網打盡。