金句王炒熱氣氛

陳柏宇紅館開騷黎明撐場

前晚，一連兩場的“陳柏宇Fight For Live in Hong Kong Coliseum”演唱會在紅館揭開序幕。陳柏宇(Jason)邀得當天五十五歲生日的黎明 (Leon) 擔任表演嘉賓，令演唱會生色不少。Leon亦發揮幽默本色，大爆金句，更稱陳柏宇為師兄，讚他好顧家，炒熱現場氣氛。

演唱會甫開始，Jason穿上紅色大褸登場，唱出了《對得起自己》，配合演唱會“Fight For”的主題。Jason之後與第一組嘉賓Nowhere Boys合唱了《無處遊人》、《時機》，然後他再唱出《想創》及新歌《有我》，提醒大家，在奮鬥過程裡，你我並不孤單。

接下來，Jason穿上演唱會紀念品之一的棒球衫亮相，感性道出他奮鬥背後的最大能量：“這三年轉變好多，大家都經歷好多唔同嘅嘢，但呢三年教曉我一樣嘢，面對無常，我哋可能隨時會失去，所以一定要時刻珍惜，時刻Fight For，Fight For每一次上舞台嘅機會，係你哋每一個人令到陳廣偉（Jason原名）成為陳柏宇，沒有你，我甚麼都不是。”Jason之後送上《沒有你，我甚麼都不是》，答謝大家的支持。

到了Encore環節，他介紹嘉賓黎明 (Leon) 上台，Leon一出場即大爆金句，更稱陳柏宇師兄，讚他顧家，又搞笑道：“我做呢行咁耐有個諗法，只要我早到，運氣就唔好。今日話我九點半出場，我八點五十分就到咗，但而家都十點二十分了，唔緊要，唔關你事。”陳柏宇即代大家講對唔住，Leon即笑言自已最想唱《越夜越有機》，但卻變了《越夜越眼瞓》：“但唔緊要啦，做呢行就係呃呃口氹口氹，咁就成世。講老實說話係朋友，講真心話先係摯友，等個幾鐘都唔緊要啦，在後台聽到音質好，聲音又好，努力、加油，Jason係一個好好嘅歌手。”接着二人合唱了《越夜越有機》，掀起了全晚的高潮。Leon的出現為觀眾帶來了驚喜，Jason之後再連唱《I Miss You》、《霸氣情歌》等多首名曲後，演唱會圓滿結束。

前晚“陳柏宇Fight For Live in Hong Kong Coliseum”首場演唱會，Jason的太太符曉薇抱着二人三歲的女兒陳羿辰到場為他打氣，Jason的圈中好友黃妍、小塵埃、布志綸、江伊晴和老公蕭唯展都有到來捧場。